روسیه تقویت مرز تاجیکستان با افغانستان را در اولویت گذاشت

آندری بلوسوف، وزیر دفاع روسیه، اعلام کرد که تقویت امنیت مرزهای مشترک تاجیکستان با افغانستان در صدر برنامه‌های امنیتی و دفاعی مسکو قرار گرفته است. او گفت روسیه در چارچوب همکاری‌های دوجانبه و سازوکارهای امنیتی منطقه‌ای، توجه ویژه‌ای به این مرز دارد.

بلوسوف روز سه‌شنبه ۱۷ سنبله در مراسم سی‌وپنجمین سالگرد استقلال تاجیکستان در مسکو گفت که فرمت‌های امنیت دسته‌جمعی در چارچوب سازمان پیمان امنیت دسته‌جمعی، سازمان همکاری شانگهای و کشورهای مستقل مشترک‌المنافع به‌گونه فعال گسترش می‌یابد. او تأکید کرد که در این میان، تقویت مرز تاجیکستان با افغانستان جایگاه ویژه دارد.

وزیر دفاع روسیه همچنین از همکاری نزدیک نظامی میان مسکو و دوشنبه سخن گفت و افزود که پایگاه نظامی ۲۰۱ روسیه در تاجیکستان برای مقابله با تهدیدهای خارجی در حالت آماده‌باش قرار دارد. او تاجیکستان را شریک استراتژیک روسیه نیز توصیف کرد.

این موضع‌گیری در ادامه رایزنی‌های امنیتی اخیر دو کشور مطرح شده است. ولادیمیر پوتین، رئیس‌جمهور روسیه، هفته گذشته در دیدار با امامعلی رحمان، رئیس‌جمهور تاجیکستان، گفته بود که مسکو از نگرانی‌های دوشنبه درباره وضعیت افغانستان آگاه است و دو طرف در زمینه تأمین امنیت، تماس نزدیک دارند.

تاجیکستان در ماه‌های اخیر بارها نسبت به تهدیدهای امنیتی در امتداد مرز خود با افغانستان هشدار داده است. به گفته مقام‌های این کشور، پس از چند رویداد امنیتی در مناطق مرزی، از جمله حملات مسلحانه و پهپادی در اواخر سال گذشته میلادی، نگرانی‌ها در دوشنبه افزایش یافته و مهاجمان با گروه‌های مسلح مستقر در افغانستان مرتبط دانسته شده‌اند.

روسیه نیز از زمان بازگشت اداره طالبان به قدرت، چندین بار درباره خطر گسترش بی‌ثباتی و تهدیدهای تروریستی از افغانستان به آسیای مرکزی هشدار داده است. مرز تاجیکستان با افغانستان حدود ۱۳۰۰ کیلومتر طول دارد و از مهم‌ترین خطوط مرزی در شمال افغانستان به شمار می‌رود.