اداره طالبان درگیری مرزی با تاجیکستان را به قاچاق نسبت داد

در پی گزارش تاجیکستان از یک درگیری مسلحانه در امتداد مرز دو کشور، اداره طالبان مدعی شد که تحرکات اخیر در این ساحه تحت کنترل قرار گرفته و به‌جز رفت‌وآمد قاچاقچیان، مشکل امنیتی جدی یا اقدام نظامی علیه تاجیکستان وجود ندارد.

ذبیح‌الله مجاهد، سخنگوی اداره طالبان، گفت کابل اجازه هیچ‌گونه تحرک نظامی در مرز افغانستان و تاجیکستان را نمی‌دهد. او افزود چند روز پیش تحرکاتی در امتداد این مرز رخ داده بود، اما اکنون مهار شده است.

مجاهد همچنین گفت که رفت‌وآمد قاچاقچیان در امتداد این مرز از گذشته وجود داشته، اما به گفته او از خاک افغانستان علیه تاجیکستان اقدامی صورت نخواهد گرفت. این اظهارات در حالی مطرح شده است که مقام‌های تاجیکستان از وقوع درگیری مسلحانه در این خط مرزی خبر داده‌اند.

کمیته امنیت ملی تاجیکستان اعلام کرده است که در جریان این رویداد، دو شهروند افغانستان کشته شده‌اند. به گفته این نهاد، این دو تن باشنده ولسوالی امام‌صاحب ولایت قندوز بودند و پس از ورود غیرقانونی به منطقه فتح‌آباد در ولسوالی جیحون ولایت ختلان، حدود ۱۷ کیلوگرام حشیش همراه داشتند.

مرز افغانستان و تاجیکستان در سال‌های اخیر از ساحات حساس امنیتی در آسیای مرکزی به شمار رفته است. تاجیکستان بارها درباره تهدیدهای امنیتی و فعالیت‌های غیرقانونی در امتداد این مرز ابراز نگرانی کرده و اداره طالبان نیز همواره مدعی شده است که اجازه استفاده از خاک افغانستان علیه کشورهای همسایه را نمی‌دهد.