صلیب سرخ ۱۴ قلم دوا به شفاخانه ولایتی تخار کمک کرد

کمیته بین‌المللی صلیب سرخ (ICRC) در حمایت از روند ارائه خدمات صحی، ۱۴ قلم دوا به ارزش ۳۶۰ هزار افغانی به شفاخانه ولایتی و تخصصی تخار کمک کرده است.

دکتر حیات‌الله سالار، آمر شفاخانه ولایتی تخار، گفته است این دواها بر بنیاد نیازمندی‌های شفاخانه و وضعیت صحی بیماران، با رعایت شفافیت و عدالت، در اختیار بیماران نیازمند قرار داده می‌شود.

او همچنان از نهادهای بین‌المللی صحی، مؤسسه‌های همکار و بنیادهای خیریه خواسته است همکاری‌های شان را برای بهبود کیفیت خدمات صحی و تأمین نیازمندی‌های بیماران با این شفاخانه افزایش دهند.

به گفته مسئولان شفاخانه، هدف از این کمک، فراهم‌سازی زمینه ارائه خدمات صحی بهتر و به‌موقع برای بیماران عنوان شده است. تخار از ولایت‌های شمال‌شرق افغانستان است و شفاخانه ولایتی آن به شمار زیادی از باشنده‌گان مرکز و ولسوالی‌های این ولایت خدمات ارائه می‌کند.