تاجیکستان و یوناما بر تداوم گفت‌وگوها درباره امنیت افغانستان تأکید کردند

سراج‌الدین مهرالدین، وزیر خارجه تاجیکستان، در دیدار با رباب فاطمه، رئیس جدید هیئت معاونت سازمان ملل متحد در افغانستان (یوناما)، بر ادامه گفت‌وگوها و همکاری‌ها درباره وضعیت افغانستان تأکید کرده است.

وزارت خارجه تاجیکستان اعلام کرد این دیدار روز سه‌شنبه در حاشیه هشتاد و یکمین نشست مجمع عمومی سازمان ملل برگزار شد. به گفته این وزارت، دو طرف درباره نیاز به تلاش‌های هماهنگ بین‌المللی برای مقابله با تروریزم، افراط‌گرایی و دیگر چالش‌های فرامرزی گفت‌وگو کردند.

براساس بیانیه وزارت خارجه تاجیکستان، وزیر خارجه این کشور همچنین بر تعهد دوشنبه برای حمایت از صلح و ثبات در افغانستان تأکید کرده است. در این دیدار، دو طرف بر تقویت همکاری‌ها و دوام گفت‌وگوها در باره موضوعات مختلف نیز تأکید کردند.

یوناما یا هیئت معاونت سازمان ملل متحد در افغانستان، دفتر سیاسی سازمان ملل در افغانستان است که مأموریت آن پیگیری تحولات سیاسی، حقوق بشری و هماهنگی بخشی از کمک‌های بین‌المللی عنوان شده است.