گفتگوی امامعلی رحمان و آنتونیو گوترش درباره تحولات افغانستان در حاشیه نشست شانگهای

امامعلی رحمان، رئیس‌جمهور تاجیکستان، با آنتونیو گوترش، دبیرکل سازمان ملل متحد، در حالی درباره تحولات افغانستان گفت‌وگو کرد که نگرانی‌های امنیتی دوشنبه در امتداد مرز با افغانستان در هفته‌های اخیر افزایش یافته است.

این دیدار روز دوشنبه در حاشیه نشست سازمان همکاری شانگهای در قرغیزستان انجام شد. سازمان ملل اعلام کرده است که دو طرف درباره همکاری‌های دوجانبه و تحولات منطقه‌ای گفت‌وگو کرده‌اند و افغانستان نیز بخشی از این گفت‌وگوها بوده است.

سازمان ملل جزئیات بیشتری از محور گفت‌وگوهای مربوط به افغانستان منتشر نکرده است. با این حال، مطرح شدن این موضوع هم‌زمان با هشدارهای اخیر مقام‌های تاجیکستان درباره پیامدهای امنیتی اوضاع افغانستان صورت می‌گیرد.

در هفته‌های اخیر، رویدادهای مرزی و درگیری‌های مسلحانه بر نگرانی‌های امنیتی تاجیکستان افزوده است. از جمله، درگیری‌ها در بدخشان افغانستان و یک رویداد مرزی که در نتیجه شلیک از خاک افغانستان، یک زن در منطقه درواز تاجیکستان شهید شد، با واکنش مقام‌های این کشور همراه بوده است.

در این دیدار، گوترش همچنین از نقش تاجیکستان در مدیریت منابع آب و تلاش‌های این کشور برای حفاظت از یخچال‌های طبیعی قدردانی کرده است. تاجیکستان در شمال افغانستان موقعیت دارد و بخش‌هایی از مرز دو کشور در امتداد ولایت بدخشان افغانستان قرار گرفته است.