برشنا برای تأمین برق مناطق مرزی بدخشان با شرکت تاجیکستانی توافق کرد

شرکت برشنا، زیر کنترول اداره طالبان، اعلام کرده است که برای تأمین برق مناطق مرزی ولایت بدخشان با شرکت تاجیکستانی پامیر انرژی توافق‌نامه امضا کرده است. افغانستان حدود ۷۵ درصد برق مورد نیاز خود را از کشورهای همسایه، به‌ویژه کشورهای آسیای میانه، وارد می‌کند.

این توافق‌نامه روز شنبه، ۱۱ میزان، در دوشنبه، پایتخت تاجیکستان، از سوی عبدالحق همکار، رییس شرکت برشنا، و امیرخان رحیم، رییس پامیر انرژی، امضا شد. برشنا همچنین از گفت‌وگوها با تاجیکستان درباره تمدید قرارداد انتقال برق ۱۱۰ کیلوولت به مرکز بدخشان خبر داده است.

به گفته برشنا، پامیر انرژی پیشنهادهای دیگر این شرکت درباره تأمین برق و تمدید قراردادها را نیز بررسی می‌کند. اداره طالبان این توافق را گامی برای گسترش همکاری دوجانبه و تأمین برق توصیف کرده است.

برشنا در هشتم میزان نیز از تاجیکستان خواسته بود میزان برق صادراتی به افغانستان را افزایش دهد. این درخواست در دیدار عبدالحق همکار با محمد عمر اسوزاده، رییس شرکت برق تاجیکستان، مطرح شده بود.

بر اساس اطلاعات منتشرشده، تاجیکستان در شش ماه نخست سال ۲۰۲۶ حدود ۷۰۲ میلیون کیلووات‌ساعت برق به افغانستان صادر کرده و افغانستان در این دوره بزرگ‌ترین خریدار برق تاجیکستان بوده است. افغانستان سالانه میلیون‌ها دالر برای خرید برق از تاجیکستان هزینه می‌کند.