عفو بین‌الملل خواستار دسترسی عمران خان به خانواده و خدمات صحی شد

سازمان عفو بین‌الملل هم‌زمان با سومین سالگرد بازداشت عمران خان، از دولت پاکستان خواسته است که به نخست‌وزیر پیشین این کشور و همسرش بشرا بی‌بی اجازه دهد با اعضای خانواده و وکلای‌شان دیدار کنند و از خدمات صحی مناسب بهره‌مند شوند.

این نهاد حقوق بشری اعلام کرده است که مقام‌های پاکستانی در سه سال گذشته عمران خان را از حق محاکمه عادلانه، مراقبت‌های صحی کافی و ملاقات با خانواده محروم کرده و او را برای مدت طولانی در انفرادی نگهداری کرده‌اند.

عفو بین‌الملل همچنین از دولت پاکستان خواسته است که حق تجمعات مسالمت‌آمیز هواداران عمران خان را تضمین کند و از به‌کارگیری زور و اقدامات خودسرانه در برابر معترضان خودداری شود.

عمران خان، نخست‌وزیر پیشین پاکستان، از سال ۲۰۲۳ در پی پرونده‌های قضایی گوناگون بازداشت شده و وضعیت او همواره با واکنش نهادهای حقوق بشری و بخشی از جریان‌های سیاسی این کشور همراه بوده است.