فراغت ۸۸ دانشجو از انستیتوت صحت عامه بلخ

ریاست صحت عامه بلخ اعلام کرده است که ۸۸ دانشجو از رشته‌های نرسنگ و رادیولوژی انستیتوت علوم صحی این ولایت سند فراغت دریافت کردند. این دانشجویان شامل ۴۹ تن از بخش نرسنگ و ۳۹ تن از بخش رادیولوژی می‌باشند.

در خبرنامه دفتر رسانه‌های ریاست صحت عامه بلخ آمده است که مراسم فراغت روز چهارشنبه، شانزدهم ماه شوال، با حضور مسئولان صحی و مهمانان برگزار شد.

به گفته این منبع، رحمت‌الله منصور، رئیس صحت عامه بلخ، داکتر امل شاه، آمر انستیتوت علوم صحی، داکتر احسان‌الله کلیوال، رئیس شفاخانه ولایتی، شماری از کارمندان بخش صحت، بزرگان قومی و دیگر مهمانان در این برنامه اشتراک داشتند.

انستیتوت علوم صحی بلخ زیر چتر ریاست صحت عامه این ولایت فعالیت می‌کند و همه‌ساله دانشجویان را در رشته‌های مورد نیاز سکتور صحت آموزش می‌دهد.