اتاق‌های تجارت افغانستان و تاجیکستان بر گسترش دادوستد تأکید کردند

مسئولان اتاق‌های تجارت افغانستان و تاجیکستان در دیداری آنلاین درباره افزایش مبادلات تجارتی، سرمایه‌گذاری و همکاری میان سکتور خصوصی دو کشور گفتگو کردند.

سید کریم هاشمی، رئیس اتاق تجارت و سرمایه‌گذاری افغانستان، و فرهاد شاه رحمان علیزاده، رئیس اتاق تجارت و صنایع تاجیکستان، ایجاد ارتباط مستقیم میان تاجران و سرمایه‌گذاران و برگزاری برنامه‌های مشترک اقتصادی را بررسی کردند.

هاشمی از تاجران و سرمایه‌گذاران تاجیکستان دعوت کرد تا در پنجمین نمایشگاه بین‌المللی ابوحنیفه در کابل اشتراک کنند. در مقابل، رئیس اتاق تجارت و صنایع تاجیکستان از هیئت افغانستان برای حضور در نمایشگاه بزرگ تجارتی و صنعتی تاجیکستان در شهر دوشنبه دعوت کرد.

دو طرف همچنین بر تبادل هیئت‌های تجارتی و تقویت همکاری‌های پایدار میان سکتور خصوصی دو کشور تأکید کردند.