توماس نیکلاسون و وزیر خارجه تاجیکستان درباره تهدیدهای موجود در افغانستان گفت‌وگو کردند

وزارت خارجه تاجیکستان از دیدار سراج‌الدین محرم‌الدین، وزیر خارجه این کشور و توماس نیکلاسون، نماینده ویژه اتحادیه اروپا برای افغانستان خبر داده است.

این وزارت در بیانیه‌ای نوشته است که دو طرف روز دوشنبه، ۱۵ دلو، درباره وضعیت جاری افغانستان گفت‌وگو کرده‌اند.

طبق بیانیه، دو طرف درباره چالش‌ها و تهدیدهای موجود در افغانستان گفت‌وگوی سازنده‌ای انجام داده‌اند.

وزیر خارجه تاجیکستان همچنان در مورد روابط کشورش با اتحادیه اروپا ابراز نظر کرده است.

تاجیکستان پس از تسلط دوباره طالبان بر افغانستان، همواره از حضور گروه‌های تروریستی و تهدیدهای مرزی در این کشور ابراز نگرانی کرده است.

دوشنبه تا کنون طالبان را به رسمیت نشناخته است.

پیش‌تر از این، یک مقام طالبان گفته بود که چانه‌زنی‌ها درباره روابط دیپلماتیک میان این گروه و تاجیکستان آغاز شده است.