چند شهروند چینی در مراسم فاتحه حقانی شرکت کردند

شماری از شهروندان چینی در مراسم فاتحه خلیل‌الرحمان حقانی؛ وزیر مهاجرین طالبان شرکت کرده‌اند.

برخی اعضای طالبان دیروز یکشنبه، ۲۵ قوس تصاویری از مراسم فاتحه‌خوانی خلیل‌الرحمان حقانی منتشر کرده‌اند که حضور شهروندان چینی را در آن نشان می‌دهد.

این مراسم روز گذشته در ولسوالی «گرده‌سیری» پکتیا برگزار شد و در آن سراج‌الدین حقانی و برخی دیگر از مقام‌های طالبان شرکت کردند.

کاربران شبکه‌های اجتماعی در واکنش به حضور چینی‌ها در این مراسم آن را نشان‌دهنده روابط سازنده شبکه حقانی با کشورهای منطقه، از جمله چین، خوانده‌اند.

این در حالی است که چینی‌ها پس از تسلط طالبان بر افغانستان در بخش‌های مختلف به ویژه معادن افغانستان سرمایه‌گذاری کرده‌اند.