قدردانی امریکا از تاجیکستان به دلیل عدم واگذاری هواپیماهای افغانستان به طالبان

در حالی‌ که طالبان تلاش دارند تا هواپیماهای ارتش پیشین را که در تاجیکستان قرار دارند پس بگیرند، سفارت امریکا برای افغانستان از تاجیکستان به خاطر تسلیم نکردن هواپیماهای افغانستان به طالبان قدردانی کرده است.

پس از تاکیدهای بی‌شمار طالبان مبنی بر بازپس‌گیری هواپیماهای افغانستان از تاجیکستان، سفارت امریکا برای افغانستان امروز یک‌شنبه، ۱۸ سنبله، به رسانه‌ها گفته که هواپیماها در مالکیت ارتش امریکا است و گفتگو درباره سرنوشت آن‌ها با تاجیکستان جریان دارد.

این سفارتخانه افزوده که امریکا در حال گفتگو با تاجیکستان برای تصمیم‌گیری درباره سرنوشت این هواپیماها است.

این در حالی است که پس از سقوط نظام جمهوری اسلامی افغانستان در اسد ۱۴۰۰، تعدادی از هواپیماهای ارتش حکومت پیشین به ازبکستان و تاجیکستان منتقل شدند.

وزارت دفاع امریکا پیشتر گفته بود که تا ۲۱ اگست سال ۲۰۲۱، ۴۶ فروند هواپیما به ازبکستان و ۱۸ فروند دیگر به تاجیکستان پرواز کرد. این هواپیماها شامل چرخبال‌های Mi-17 UH-60 و همچنین PC-12 ،C-208 ،AC-208 و A-29 هواپیماهای بال ثابت هستند.

مقام‌های وزارت دفاع طالبان نیز در ماه قوس ۱۴۰۱ گفتند که ازبکستان و تاجیکستان به درخواست‌ این گروه برای بازگرداندن هواپیماهای افغانستان پاسخ نداده‌اند.

پیشتر سفیر امریکا در ازبکستان نیز اعلام کرد که بنا به یک توافق جدید، ۴۶ هواپیما و چرخبال‌ ارتش سابق افغانستان در اختیار حکومت اوزبیکستان باقی می‌ماند.

طالبان توافق امریکا و ازبکستان درباره هلیکوپترهای ارتش پیشین افغانستان را غیرقابل قبول خواند.

وزارت دفاع طالبان گفت امریکا حق اهدا و مصادره اموال مردم افغانستان را ندارد و از اوزبیکستان خواست هواپیماهای نیروی هوایی افغانستان را تحویل دهد.

مقامات ازبکستان در تاریخ ۱۵ اگست ۲۰۲۱ اعلام کردند که ۲۲ فروند هواپیمای نظامی و ۲۴ چرخبال نیروهای مسلح افغانستان وارد حریم هوایی ازبکستان شدند.

اشرف‌غنی؛ رییس‌ جمهور پیشین افغانستان، به همراه جمعی از همکارانش نیز با استفاده از سه چرخبال نظامی به ازبکستان فرار کرد و سپس به امارات متحده عربی رفت.