گفت‌وگوهای مقام‌های چین، امارات متحده عربی و تاجیکستان در مورد افغانستان

یو شیائونگ، نماینده ویژه چین در امور افغانستان از گفت‌وگوهای جداگانه‌اش با معاون وزارت امور خارجه تاجیکستان و مشاور ارشد وزارت خارجه امارات متحده عربی، در مورد افغانستان خبر داده است.

شیائونگ روز شنبه، ۲۵ قوس، در صفحه ایکس نوشته که او در دیدار با فرهاد سلیم، معاون وزارت خارجه تاجیکستان، درباره تلاش‌های مشترک بیجینگ و دوشنبه برای تعامل و کمک به افغانستان گفت‌وگو کرده است.

نماینده ویژه چین در امور افغانستان افزوده که او و سلیم الذابی، مشاور ارشد وزارت خارجه امارات متحده عربی نیز در مورد افغانستان تبادل نظر «گسترده» کرده‌اند.

چین از معدود کشورهای بود که پس از ۱۵ اگست سال ۲۰۲۱ سفارت خود را در کابل فعال کرد.

هرچند این کشور به‌گونه رسمی رژیم طالبان را به رسمیت نشناخته، اما گفته است که روابط دوستانه با طالبان دارد.

پیش از این، جنرال فرانک مکنزی، فرمانده پیشین مرکزی ارتش ایالات متحده گفته بود که افغانستان یک کشور مورد علاقه برای چین است.