کشته‌شدن دو باشنده بدخشان بر اثر تیراندازی مرزبانان تاجیکستان
- انتشار: ۲۱ جوزا ۱۴۰۳
- سرویس: امنیت و حوادث
- شناسه مطلب: 184359
منابع محلی در بدخشان می‌گویند که دو باشنده ولسوالی یاوان این ولایت، در پی تیراندازی مرزبانان تاجیکستان جان باخته‌اند.
به نقل از روزنامه ۸صبح، منابع روز دوشنبه، ۲۱ جوزا، در صحبت با این روزنامه می‌گویند که این افراد حسیب‌الله و خلیل نام داشتند.
به گفته منابع، حسیب و خلیل روز گذشته در روستای شولیر ولسوالی یاوان در مرز میان افغانستان و تاجیکستان زمانی هدف تیراندازی قرار گرفتند که در میان یک گروه ۱۵ تنی که هویت‌شان مشخص نیست، می‌خواستند وارد خاک تاجیکستان شوند.
طبق اظهارات منابع، این گروه پس از تیراندازی جنگ‌جویان مرزی تاجیکستان از ساحه فرار کرده و در نقطه مرزی متواری شده‌اند.
مقام‌های تاجیکستانی و طالبان تا کنون به‌گونه رسمی در این مورد ابراز نظر نکرده‌اند.
یافته‌های روزنامه ۸صبح نشان می‌هد که با روی کار آمدن طالبان در افغانستان، حدود ۳۰۰ خانواده اعضای حرکت اسلامی اوزبیکستان و انصارالله تاجیکستان در شمال‌شرق، به‌ویژه در بدخشان زنده‌گی می‌کنند.
با این حال، تاجیکستان همواره از موجودیت گروه‌های تروریستی در خاک افغانستان زیر حاکمیت طالبان ابراز نگرانی کرده است.
نظرات(۰ دیدگاه)