هشت کارگر افغانستانی در انفجار معدن در تاجیکستان جان باختند

برخی رسانه‌ها گزارش داده‌اند که وقوع انفجار در یک معدن زغال‌سنگ در ولایت سغد تاجیکستان، جان هشت کارگر اهل افغانستان را گرفت.

برخی رسانه‌ها به نقل از منابع‌شان گزارش داده‌اند که وقوع انفجار در یک معدن زغال‌سنگ در ولایت سغد تاجیکستان، جان هشت کارگر اهل ولایت دایکندی افغانستان را گرفت.

بر اساس گزارش این رسانه‌ها، پنج نفر از قربانیان باشندگان روستای‌های «لرگر»، «الودال» و «غاسور» ولسوالی شهرستان، دو نفر از روستای «چرخ برگر» ولسوالی میرامور و یک نفر دیگر از «خوشک» ولسوالی اشترلی بودند.

به‌گفته‌ی منابع، برخی از قربانیان جوانان تحصیل‌کرده بودند.

گفته می‌شود که جنازه‌های قربانیان صبح امروز شنبه، ۲۰ ثور به افغانستان منتقل شده و پیش‌ازچاشت به ولایت قندوز رسیده است.

بر اساس گزارش رسانه‌ها، پس‌ازچاشت دیروز (جمعه، ۱۹ ثور) ساعت ۱:۳۰ دقیقه به وقت تاجیکستان، در معدن‌های زغال‌سنگ سرکویی در ناحیه عینی ولایت سغد تاجیکستان انفجار رخ داده است. این منبع دلیل انفجار را گاز درون معدن خواند.

این رسانه‌ها به نقل از منابع افزوده‌اند که کارگران اهل افغانستان برای یک شرکت پیمان‌کار افغانستانی کار می‌کردند.

مقام‌های تاجیکستان و رسانه‌های این کشور تا کنون درباره‌ی این حادثه چیزی نگفته‌اند.

به‌دلیل بیکاری در افغانستان، شهروندان کشور و به‌ویژه جوانان برای کارگری به کشورهای همسایه می‌روند و در آن‌جا معمولا مشغول‌ کارهای سخت، از جمله معدن هستند.

پیش از این هم شهروندان افغانستان در معادن کشورهای ایران و پاکستان جان باخته بودند.