طالبان: ۴۳ شهروند افغانستان از سودان تخلیه شدند

وزارت امور خارجه طالبان از تخلیه ۴۳ تن از شهروندان گیرمانده افغانستان از سودان به عربستان‌ سعودی خبر داده است.

حافظ ضیا احمد، معاون سخنگوی وزارت امور خارجه طالبان، دوشنبه‌شب، ۱۱ ثور، در رشته توییت‌هایی گفته که این تعداد از شهروندان کشور در دومین اقدام برای تخلیه افغان‌های گیرمانده در سودان، به عربستان‌ سعودی انتقال داده‌ شده‌اند.

به گفته ضیا احمد، شهروندان نجات داده شده افغانستان از سودان به شهر جده منتقل شده و در هوتل‌های این شهر به‌گونه موقت اسکان یافته‌اند. قرار است آنان به‌زودی به افغانستان منتقل شوند.

معاون سخنگوی وزارت امور خارجه طالبان هرچند در مورد شهروندان باقی‌مانده افغانستان در سودان آماری نداده اما تاکید کرده که تلاش‌های آنان برای نجات شهروندان گیرمانده ادامه دارد.

طالبان پیش از این نیز از تخلیه نخستین دسته از شهروندان کشور از سودان به عربستان‌ سعودی خبر داده بودند.

طالبان در هر دو دور از تخلیه شهروندان کشور از سودان، از همکاری همه‌جانبه و بی‌قیدوشرط عربستان‌ سعودی قدردانی کرده‌اند.

گفتنی‌ است که امیرخان متقی، سرپرست وزارت امور خارجه طالبان، نزدیک به ۱۰ روز پیش گفت که ۱۲۰ تن از شهروندان کشور در درگیری‌های سودان گیر مانده‌اند.