طالبان: پناهگاه‌های داعش در پاکستان و تاجیکستان است

وزارت داخله طالبان ادعا کرده‌است که داعش خراسان در کشورهای تاجیکستان و پاکستان پایگاه و پناهگاه دارد.

عبدالمتین قانع؛ سخنگوی وزارت داخله طالبان امروز چهارشنبه، ۷ سنبله در گفتگو با شبکه طلوع نیوز ادعا کرد که موجودیت پناهگاه‌های داعش در پاکستان و تاجیکستان اتهام نیست بلکه در عمل دیده شده‌است.

او افزود که کشورهای منطقه نیز به این باورند که در حمله‌های اخیری که صورت گرفت تاجیکستان و پاکستان به گونه مستقیم دخالت داشتند. اشاره وی ظاهرا به حملات داعش در روسیه و ایران است.

به گفته سخنگوی وزارت داخله طالبان، اتباع تاجیکستان و پاکستان در حمله‌های اخیر در منطقه دخیل بوده‌اند. او ادعا کرد که طالبان در این مورد مدرک و ثبوت دارند.

پاکستان و تاجیکستان همواره افغانستان را منبع تهدیدهای تروریستی معرفی می‌کنند. این کشورها طالبان را متهم می‌کنند که به گروه‌های داعش، القاعده، تحریک طالبان پاکستانی و انصارالله تاجیکستان پناه داده‌اند.

چندی پیش شورای امنیت سازمان ملل در گزارشی موارد مشابهی را اعلام کرد و گفت چندین گروه تروریستی در افغانستان زیر اداره طالبان فعالیت دارند. طالبان اما این گزارش‌ها و اتهام‌ها را رد می‌کنند.