طالبان: اتشه‌ها در بخش‌های فرهنگی، تجاری و مهاجران فعالیت دارند

سخنگوی گروه طالبان می گوید که اتشه‌های حکومت این گروه در بخش‌های فرهنگی، تجاری و مهاجران فعالیت دارند.

به نقل از طلوع نیوز، ذبیح الله مجاهد، سخنگوی طالبان گفته است که هم‌زمان با فعالیت سفارت‌خانه‌های حکومت سرپرست این گروه در شانزده کشور، اتشه‌های این سفارت‌خانه‌ها نیز در بخش‌های گوناگون فعالیت دارند.

به گفته مجاهد،‌ اتشه‌های حکومت سرپرست طالبان در بخش‌های سیاسی، فرهنگی، اقتصادی، تجاری و مهاجران فعالیت می‌کنند تا در بخش‌های مربوطه به شهروندان افغانستان خدمات ارایه کنند.

وی گفت: «در بعضی کشورها اتشه‌های حکومت گذشته کار می‌کنند و در بعضی جاها اتشه‌های نو هم فرستاده شده‌اند که بیشتر شان اتشه‌های فرهنگی، اقتصادی، تجاری و در امور مهاجران باند که به کارها رسیدگی می‌کنند.»

سخنگوی طالبان می‌گوید که برخی این اتشه‌ها از نظام قبلی و شماری هم تازه از سوی حکومت این گروه معرفی شده‌اند.