اداره طالبان کنسول افغانستان در خاروغ تاجیکستان را برکنار کرد

منابع آگاه در تاجیکستان تأیید می‌کنند که اداره طالبان نقیب‌الله دهقان‌زاده، کنسول افغانستان در شهر خاروغ، مرکز ولایت بدخشان تاجیکستان، را از وظیفه برکنار کرده و فعالیت‌های این کنسول‌گری را متوقف ساخته است.

به گفته منابع، این تصمیم روز دوشنبه، اول جدی، عملی شده و وزارت خارجه اداره طالبان از تاریخ ۱۵ دسامبر ۲۰۲۵ به‌گونه رسمی ختم وظیفه دهقان‌زاده را اعلام کرده است. دهقان‌زاده از دیپلمات‌های حکومت پیشین افغانستان بود که پس از سقوط کابل، با اداره طالبان تعامل و هماهنگی کاری داشت.

منابع می‌افزایند که هم‌زمان با ختم وظیفه، حدود ۱۲۰ هزار دالر امریکایی از سوی دهقان‌زاده به وزارت خارجه اداره طالبان انتقال داده شده است؛ موضوعی که ابهام‌های جدی در مورد شفافیت مالی و نحوه مدیریت نمایندگی‌های دیپلماتیک افغانستان زیر اداره طالبان ایجاد می‌کند.

بر اساس اطلاعات موجود، برکناری دهقان‌زاده در حالی صورت گرفته که او تلاش داشت با حمایت اداره طالبان، به‌جای ظاهر اغبر به‌عنوان سفیر افغانستان در تاجیکستان معرفی شود؛ تلاشی که به نتیجه نرسیده است.

تاجیکستان تاکنون اداره طالبان را به رسمیت نشناخته و نمایندگان معرفی‌شده از سوی این گروه را در سفارت افغانستان در دوشنبه و کنسول‌گری خاروغ نپذیرفته است؛ موضوعی که محدودیت‌های جدی بر فعالیت‌های دیپلماتیک افغانستان در این کشور ایجاد کرده است.