تسلیت تاجیکستان به قربانیان زلزله در شرق افغانستان

وزارت امور خارجه تاجیکستان با انتشار بیانیه‌ای اعلام کرده است که جان‌باختن و زخمی شدن شماری از باشنده‌گان افغانستان در پی زلزله نیرومند اخیر در شرق کشور، باعث اندوه مردم تاجیکستان شده است.

در این بیانیه از مردم افغانستان به‌عنوان «ملت برادر و همسایه» یاد شده و آمده است که جمهوری تاجیکستان مراتب همدردی و تسلیت خود را به خانواده‌های قربانیان این رویداد طبیعی ابراز می‌دارد.

این کشور همچنین برای بازمانده‌گان قربانیان صبر و برای زخمی‌شده‌گان شفای عاجل آرزو کرده است.

زلزله‌ روزهای اخیر در شرق کشور، در حالی رخ می‌دهد که مناطق آسیب‌دیده عمدتاً از خدمات اساسی و کمک‌های فوری محروم مانده‌اند و اداره طالبان نیز قادر به پاسخ‌گویی مؤثر به نیازهای مردم در این‌گونه بحران‌ها نیست.