تاجیکستان و چین درباره وضعیت افغانستان گفتگو کردند

سراج‌الدین مهرالدین، وزیر امور خارجه تاجیکستان، با وانگ‌یی، همتای چینی‌اش، در شهر دوشنبه دیدار کرده و بخش مهمی از گفت‌وگوهای‌شان را به تحولات افغانستان اختصاص داده‌اند. به گفته مقام‌های دو کشور، افغانستان به عنوان همسایه مشترک، نقش کلیدی در ثبات منطقه دارد.

وزیران خارجه چین و تاجیکستان در این دیدار تأکید کرده‌اند که با وجود تسلط اداره طالبان، صلح و ثبات در افغانستان نیازمند همکاری‌های منطقه‌ای و بین‌المللی است. آن‌ها تعهد سپرده‌اند که برای بهبود اوضاع در افغانستان همکاری‌های‌شان را ادامه دهند.

براساس اعلامیه وزارت خارجه چین، طرفین همچنین موضوعاتی مانند روابط دوجانبه، گسترش همکاری‌ها در عرصه‌های اقتصادی، امنیتی و سیاست منطقه‌ای را بررسی کرده‌اند. چین بر ارتقای طرح ابتکار کمربند و جاده در سطوح بلندتر در تعامل با تاجیکستان تأکید داشته است.

وزیر خارجه تاجیکستان گفته است روابط دو کشور مبتنی بر اعتماد متقابل بوده و همکاری‌های دوجانبه در زمینه‌های گوناگون، از جمله امنیت و اقتصاد، در حال گسترش است.