سفیر تاجیکستان از خانواده‌های آسیب‌دیده زلزله در کنر دیدار کرد

جعفر ساعدی، سفیر جمهوری تاجیکستان در افغانستان، در سفری به ولایت کنر با خانواده‌های آسیب‌دیده از زلزله دیدار کرده و با آن‌ها ابراز همدردی نمود.

بر بنیاد معلومات نشرشده از سوی آژانس باختر، سفیر تاجیکستان در این دیدار بیان داشته که کشورش تا کنون سه هزار تُن مواد غذایی و اقلام ضروری را به ولایت کنر ارسال کرده است. او همچنان افزود که کمک‌های بیشتری نیز به‌زودی خواهد رسید.

در این سفر، معاون والی کنر نیز با قدردانی از حمایت‌های تاجیکستان، بر پیوندهای عمیق فرهنگی و دینی میان دو کشور تأکید کرد و همبستگی تاجیکستان با مردم آسیب‌دیده را نمونه‌ای از همکاری‌های انسانی منطقه‌یی دانست.

این در حالی است که نیازمندی‌های شدید مردم متأثر از زلزله در کنر همچنان ادامه دارد، اما اداره طالبان در فراهم‌سازی کمک‌های فوری و مؤثر به آسیب‌دیدگان ناتوان بوده و نقش کشورهایی چون تاجیکستان در پاسخ به این بحران بشری پررنگ‌تر جلوه می‌کند.