طالبان از تمدید قرارداد واردات برق از تاجیکستان خبر داد

شرکت برق افغانستان (برشنا) تحت مدیریت طالبان از تمدید واردات برق از تاجیکستان برای سال ۲۰۲۴ خبر داده است.

به‌گفته‌ی برشنا، این قرارداد در دیدار محمدحنیف حمزه، رییس اجرایی شرکت یادشده با محمدعمر آسوزاده، رییس شرکت برق تاجیکستان در ترکیه امضا شده است.

در خبرنامه‌ی برشنا که امروز (چهارشنبه، ۶ جدی) منتشر شده، آمده است که دو طرف در جریان این دیدار درباره‌ی انتقال لین ۵۰۰ کیلوولت برق از تاجیکستان به افغانستان نیز صحبت کرده‌اند و در این زمینه تاجیکستان تمایل نشان داده است.

به نقل از خبرنامه‌ی برشنا، رییس این شرکت از تاجیکستان خواسته است تا در راه‌اندازی مجدد، هماهنگی و تطبیق پروژه‌ی «کاسا یک‌ هزار» با افغانستان همکاری کند.

در پروژه‌ی «کاسا یک هزار» قرار است برق قرقیزستان و تاجیکستان از طریق خطوط انتقال انرژی با طول هزار و ۲۵۰ کیلومتر به افغانستان و پاکستان انتقال یابد.

کار این پروژه در آخر سال ۱۳۹۸ در افغانستان آغاز شد؛ اما ظاهرا بدون پیشرفت متوقف شده است.

افغانستان در حال حاضر به‌شدت به برق وارداتی از کشورهای همسایه‌ی خود وابسته است. این کشور از ازبیکستان، تاجیکستان، ترکمنستان و ایران برق وارد می‌کند.