گفتگوی پاکستان و تاجیکستان درباره امنیت افغانستان

بربنیاد گزارش‌ها، خواجه محمد آصف؛ وزیر دفاع پاکستان و یوسف شریف‌زاده؛ سفیر تاجیکستان در اسلام‌آباد درباره «وضعیت نظامی، سیاسی، اقتصادی و اجتماعی افغانستان» گفتگو کردند.

خبرگزاری دولتی خاور تاجیکستان روز جمعه ۳۰ سنبله گزارش داد که خواجه محمد آصف؛ وزیر دفاع پاکستان و یوسف شریف‌زاده؛ سفیر تاجیکستان در اسلام‌آباد درباره «وضعیت نظامی، سیاسی، اقتصادی و اجتماعی افغانستان» گفتگو کردند.

بربنیاد گزارش، در این دیدار طیف گسترده‌ای از موضوعات روابط تاجیکستان و پاکستان به ویژه در بخش امنیتی و نظامی مورد بحث و بررسی قرار گرفت.

خواجه محمد آصف و یوسف شریف‌زاده گفتند وضعیت افغانستان مستقیما بر امنیت منطقه تاثیرگذار است.

جزئیات این گفت‌وگو اعلام نشده است.

طبق این گزارش، پاکستان از تلاش‌های تاجیکستان برای تقویت صلح و ثبات در آسیای میانه قدردانی کرده است.

تاجیکستان و پاکستان که مرز مشترک با افغانستان دارند در سه سال گذشته بارها از خطرات تروریستی از افغانستان ابراز نگرانی کرده‌اند.

مقام‌های پاکستان بارها گفته‌اند تی‌تی‌پی در افغانستان پناهگاه دارد و از خاک افغانستان حملات خود را در داخل پاکستان سازمان‌دهی می‌کند.

ممتاز زهرا بلوچ؛ سخنگوی وزارت خارجه پاکستان اخیرا در یک نشست خبری در اسلام‌آباد گفت که گزارش‌های جهانی نشان می‌دهند که فعالیت‌های تحریک طالبان پاکستان و سایر گروه‌های تروریستی در افغانستان ادامه دارد.

امامعلی رحمان؛ رییس‌ جمهور تاجیکستان هم هشدار داده بود که افغانستان، به ویژه ولایات شمالی به محل پرورش تروریزم بین‌المللی تبدیل شده است.