گسترش کولرا در افغانستان؛ تاجیکستان اقدامات سخت‌گیرانه صحی را در مسیر دریای پنج تشدید می‌کند
- انتشار: ۳۱ جوزا ۱۴۰۳
- سرویس: اجتماعیبین الملل
- شناسه مطلب: 185295
به دنبال نشر گزارش سازمان صحی جهان از گسترش ۵۸ درصدی بیماری کولرا، وزارت صحت و حمایت اجتماعی از جمعیت تاجیکستان (MoHSPP) اقدامات سخت‌گیرانه صحی را در مسیر دریای پنج و ولسوالی‌های ولایت ختلان این کشور اتخاذ می‌کند.
رسانه‌های تاجیکستانی روز چهارشنبه، ۳۰ جوزا، گزارش دادند که دولت این کشور نگران سرایت این بیماری از افغانستان استند.
نوروز جعفراوف، معاون نظارت صحی و اپیدمیولوژیک دولتی وزارت صحت تاجیکستان، گفته که این اقدامات سخت‌گیرانه به هدف جلوگیری از سرایت این بیماری از افغانستان از طریق منابع آبی مشترک دو کشور روی دست گرفته شده است.
طی این اقدامات، متخصصان تاجیکستان، سایت‌های آب‌های آزاد در سراسر ولایت ختلان را بررسی می‌کنند تا علایم احتمالی آلوده‌گی را تشخیص دهند.
یکی از مقام‌های وزارت صحت تاجیکستان گفته است: «خطر انتقال بیماری در هنگام سیل یا زمانی که فاضلاب روستاهای افغانستان به رودخانه‌های ما سرازیر می‌شود، افزایش می‌یابد.»
قرار است این اقدامات سخت‌گیرانه صحی به شهرهای دوشنبه و ولایت سغد گسترش خواهد یافت.
گفتنی است که نهادهای صحی روسیه نیز تاجیکستان را در این زمینه کمک می‌کنند.
این در حالی است که سازمان صحی جهان روز گذشته گفت که در ماه می سال جاری میلادی، بیش از ۱۳ هزار مورد تازه کولرا یا وبا در افغانستان ثبت شده است و دست‌کم پنج تن در ولایت‌های بلخ، تخار، کندز و بدخشان جان باخته‌اند.
نظرات(۰ دیدگاه)