کمیته مهاجرت افغانستان خواهان توقف اخراج مهاجران از تاجیکستان شد

در حالی‌ که اخراج مهاجران افغانستان از کشورهای همسایه و منطقه، به خصوص ایران، پاکستان و ترکیه ادامه دارد، کمیته مهاجرت افغانستان از تاجیکستان خواست اخراج پناهجویان را متوقف کند.

بربنیاد گزارش‌ها، مصور بهادری؛ رییس کمیته مهاجرت افغانستان (آریانا) در تاجیکستان، خواهان توقف اخراج مهاجران از تاجیکستان شده و از تاجیکستان خواست اخراج پناهجویان را متوقف کند.

او از اخراج مهاجران افغانستان از این کشور ابراز نگرانی کرده و از تاجیکستا خواست از حقوق پناهندگان محافظت و به تعهدات بین‌المللی پایبند باشند.

بهادری در بیانیه اخیر خود به خانواده‌های افغانستانی آسیب‌دیده از این اخراج‌ها تسلیت گفته و بر تعهد این کمیته برای حمایت از مهاجران  تاکید کرده است.

او خاطرنشان کرده که روند اخراج، که بیش از یک هفته ادامه دارد، باعث نگرانی گسترده در میان جمعیت پناهجو شده است.

کمیته مهاجرت افغانستان که بیش از ۲۷ سال است در تاجیکستان فعالیت می‌کند، به‌عنوان واسطه بین پناهجویان افغانستان و مقامات محلی عمل می‌کند.

این کمیته که تحت چارچوب قانونی وزارت عدلیه تاجیکستان فعالیت دارد، به نگرانی‌های مهاجران رسیدگی و گفتگو با نهادهای دولتی را تسهیل می‌کند.

بهادری از تاجیکستان خواسته تا به تعهدات بین‌المللی‌اش احترام بگذارد.

بسیاری پناهجویان افغانستانی در تاجیکستان از آزار و اذیت طالبان فرار کرده و پناهندگی دریافت کرده‌اند.

بهادری رویکردهای جایگزین نسبت به اخراج پیشنهاد کرد که شامل موارد: «مذاکره با سازمان‌های بین المللی یا کشورهای ثالث برای تسهیل انتقال پناهجویان افغانستان، ساده‌سازی فرآیند جابه‌جای برای دسترسی بیشتر به اسکان مجدد، به جای اخراج افراد به مکان ناامن، جریمه یا حبس را به‌عنوان مجازات جرایم معرفی شود» می‌باشد.

کمیته مهاجرت افغانستان همچنین به مقامات تاجیکستان اطمینان داده که پناهجویان افغانستانی به قوانین و آداب و رسوم محلی احترام خواهند گذاشت.

این کمیته متعهد شد که با نیروهای امنیتی تاجیکستان برای رسیدگی به فعالیت‌های مکرر غیرقانونی توسط افراد از طریق اقدامات قانونی همکاری کند.

بهادری بیانیه‌اش را با حمایت از راه‌حل‌های دیپلماتیک برای محافظت از مهاجران آسیب‌پذیر افغانستان و در عین حال حفظ روابط قوی بین افغانستان و تاجیکستان خاتمه داده است.

او بر لزوم تلاش‌های مشترک برای حمایت از حقوق بشر و تضمین امنیت پناهندگان تاکید کرده است.

در همین حال، پیشتر منابع ازاخراج حدود ۲۰ هزار خانواده افغانستانی از پاکستان طی ۹ ماه اخیر خبر داد و گفت که بیش از ۱۹ هزار و ۵۰۰ خانواده مهاجر افغانستانی در ۹ ماه اخیر از پاکستان اخراج شده‌اند.

این شمار از پناهندگان از گذرگاه تورخم به افغانستان برگشته‌اند.