چین و تاجیکستان خواهان حکومت همه‌شمول در افغانستان شدند

در ادامه تاکیدها بر تشکیل یک حکومت همه شمول در افغانستان، چین و تاجیکستان بار دیگر بر تشکیل حکومت فراگیر در افغانستان تاکید کردند.

رهبران چین و تاجیکستان روز جمعه، ۱۵ سرطان با نشر بیانیه مشترک بار دیگر بر تشکیل حکومت همه شمول در افغانستان تاکید کردند.

این بیانیه مشترک در جریان سفر رسمی شی جین پینگ؛ رییس جمهور چین به تاجیکستان پس از شرکت در اجلاس سران سازمان همکاری شانگهای در آستانه، پایتخت قزاقستان صادر شده است.

چین و تاجیکستان در بیانیه مشترک از خواست‌ها برای ایجاد یک حکومت همه شمول با حضور نمایندگان تمامی گروه‌های قومی، مذهبی و سیاسی در افغانستان حمایت کردند.

بر اساس بیانیه مشترک، دو طرف تاکید کردند که یک افغانستان مستقل، بی‌طرف، متحد، همه شمول و صلح‌آمیز که عاری از تروریزم، جنگ و مواد مخدر و در صلح و آرامش با همسایگان خود باشد، به نفع مردم افغانستان و تمام کشورهای منطقه است.

این در حالی است که رهبران کشورهای عضو سازمان همکاری شانگهای نیز در بیانیه‌ای بر ضرورت تشکیل یک دولت فراگیر در افغانستان تاکید کرده بودند.

طالبان اما گفته‌اند که خواست کشورها مبنی بر ایجاد حکومت همه شمول دخالت در امور داخلی افغانستان است و مطرح ساختن چنین خواست‌ها نتیجه‌‌ای در پی نخواهد داشت.