وزیر اقوام و قبایل طالبان خواهان روابط دوستانه با تاجیکستان شد

منابع محلی در تخار می‌گویند که مولوی نورالله نوری، وزیر اقوام و قبایل طالبان، در سفرش به این ولایت خواستار همکاری و رابطه دوستانه با تاجیکستان شده است.

منابع محلی روز یک‌شنبه، ۱۶ جدی، گفتند که مولوی نورالله این سخنان را هنگام بازدید از نقطه مرزی ولسوالی دشت‌قلعه با تاجیکستان بیان کرده است.

به گفته منابع، این مقام طالبان خواهان روابط نیک با تمام کشورهای همسایه افغانستان، از جمله تاجیکستان، شده است.

منابع تصریح می‌کنند که وزیر اقوام و قبایل طالبان گفته است که پس از سفر هیأت دیپلماتیک تاجیکستان به کابل، روابط سیاسی این گروه در حال بهبودی است و به زودی تاجیکستان روند ارایه خدمات قنسلی‌اش را در کابل آغاز می‌کند.

این اظهارات عضو کابینه طالبان درباره بهبود روابط با تاجیکستان در حالی مطرح می‌شود که هفته گذشته جبهه مقاومت ملی در بیانیه‌ای گفته بود که گروه تندرو اسلام‌گرا و شبه‌نظامی انصارالله با همکاری طالبان در صدد سرنگونی حکومت امام‌علی رحمان، رییس‌ جمهور این کشور است.

براساس گزارش‌ها، گروه انصارالله با طالبان بیعت کرده و اکنون در نقاط مرزی افغانستان با تاجیکستان حضور دارد.

این در حالی است که تاجیکستان از حامیان جبهه مقاومت ملی محسوب می‌شود و دوشنبه بارها بر تهدید موجود از خاک افغانستان زیر حاکمیت طالبان هشدار داده است.