هیأت طالبان از «رییس شورای علمای تاتارستان» برای سفر به کابل دعوت کرد

وزیران تحصیلات عالی و معارف طالبان که برای شرکت در یک نشست بین‌المللی به تاتارستان روسیه رفته‌اند، در دیدار با رییس شورای علمای تاتارستان از وی برای سفر به افغانستان تحت کنترل این گروه دعوت کردند.

وزارت تحصیلات عالی طالبان امروز یکشنبه، ۲۰ جوزا، با نشر خبرنامه‌ای از دیدار ندا محمد ندیم و حبیب‌الله آغا؛ وزیران تحصیلات عالی و معارف طالبان با رستم عبدالحی؛ رییس شورای علمای تاتارستان در حاشیه نشست بین‌المللی وزیران معارف و تحصیلات عالی که در شهر کازان روسیه برگزار می‌شود، خبر داده است.

ندیم در این دیدار افزوه که افغانستان اکنون در «امن» است و طالبان در برابر مردم از «شفقت و مهربانی» کار می‌گیرند.

وزیران تحصیلات عالی و معارف طالبان روز گذشته به منظور اشتراک در نشست بین‌المللی وزیران معارف و تحصیلات عالی در شهر کازان، پایتخت جمهوری تاتارستان عازم روسیه شدند.

مقام‌های طالبان در حالی در این نشست اشتراک کرده‌اند که این گروه با حاکمیت بر افغانستان تعلیم و تحصیل دختران و زنان را منع کرده‌است و با گذشت نزدیک به سه سال و با فشارهای بین‌المللی حاضر به باز کردن مکاتب و دانشگاه‌ها به روی دختران و زنان نشده‌اند.