نیکلاسون: دسترسی کارمندان اتحادیه اروپا به تمام افغانستان برای کمک‌رسانی ضروری است

توماس نیکلاسون، نماینده ویژه اتحادیه اروپا برای افغانستان، در دیدار با مولوی عبدالکبیر، معاون سیاسی رییس‌الوزرای طالبان، گفته که دسترسی کارمندان این نهاد به تمام نقاط افغانستان برای کمک‌رسانی ضروری است.

صفحه ایکس ارگ طالبان روز سه‌شنبه، ۲۰ قوس، با نشر خبرنامه‌ای از دیدار نیکلاسون با مولوی عبدالکبیر خبر داده است.

نیکلاسون افزوده که با کشورهای همسایه گفت‌وگو کرده است تا از اخراج اجباری مهاجران افغانستانی خودداری کنند.

به گفته وی، اتحادیه اروپا ۴۵ میلیون یورو برای حمایت از کشاورزان افغانستانی و کشت بدیل اختصاص داده است.

از جانبی، مولوی عبدالکبیر نیز در این دیدار کمک‌های اخیر اتحادیه اروپا را مهم عنوان کرده است.

نامبرده همکاری سازمان‌های کمک‌رسان، از جمله اتحادیه اروپا را برای مهاجران افغانستانی مهم خوانده و تصریح کرده است که همسایه‌ها و دیگر کشورها باید اخراج اجباری افغانستانی ها را متوقف کنند.

نیکلاسون در حالی دسترسی کارمندان اتحادیه اروپا به تمام افغانستان برای کمک‌رسانی را ضروری خوانده است که چندی پیش دفتر هماهنگ‌کننده کمک‌های بشردوستانه سازمان ملل متحد در افغانستان (OCHA) گفته بود که مداخله طالبان در فعالیت نهادهای مددرسان به‌گونه چشم‌گیری افزایش یافته است.

پیش از این نیز نهادهای بین‌المللی و شهروندان کشور، از مداخله طالبان در امور کمک‌رسانی نگرانی کرده بودند.