نمایندگان آسیای مرکزی و اتحادیه اروپا درباره افغانستان گفتگو کردند
- انتشار: ۱۸ دلو ۱۴۰۳
- سرویس: تیتر 2سیاست
- شناسه مطلب: 213466
وزارت خارجه تاجیکستان از دیدار و گفتگوی نمایندگان کشورهای آسیای مرکزی و اتحادیه اروپا در مورد افغانستان در شهر دوشنبه خبر داده است.
وزارت خارجه تاجیکستان اعلام کرده است که نمایندگان ویژه کشورهای آسیای مرکزی و اتحادیه اروپا روز چهارشنبه، ۱۷ دلو در ششمین نشست خود در مورد افغانستان، تحولات سیاسی، اقتصادی و اجتماعی این کشور را بررسی کردند.
این وزارت گفته است که این نشست در شهر دوشنبه، پایتخت تاجیکستان برگزار شد.
وزارت خارجه تاجیکستان گفته است که اشتراک‌کنندگان این نشست در مورد وضعیت حقوق بشر در افغانستان، از جمله وضعیت زنان و دختران و چالش‌ها و تهدیدات امنیتی افغانستان نیز گفتگو کردند.
این وزارت افزوده است که در این نشست رویکرد کشورهای آسیای مرکزی و اتحادیه اروپا برای کمک به افغانستان نیز بررسی شد.
اکثر کشورهای آسیای مرکزی به‌جز تاجیکستان تعامل گسترده سیاسی و اقتصادی با طالبان دارند.
در همین حال، مقام‌های این کشورها و سازمان پیمان امنیت جمعی بارها از تهدیدات امنیتی ناشی از افغانستان ابراز نگرانی کرده‌اند.
نظرات(۰ دیدگاه)