نشست پروژه کاسا ۱۰۰۰؛ هیأت طالبان به تاجیکستان سفر کرد

ریاست برق‌رسانی «برشنا» زیر اداره طالبان از سفر هیأتی این گروه برای شرکت در نشست پروژه کاسا ۱۰۰۰ به تاجیکستان خبر داده است.

این شرکت روز چهارشنبه، ۲۴ ثور، در خبرنامه‌ای گفته که هیأت طالبان به ریاست عبدالباری عمر، رییس شرکت برشنا، به شهر دوشنبه، پایتخت تاجیکستان، سفر کرده است.

براساس خبرنامه، نشست پروژه کاسا ۱۰۰۰ با حضور نماینده‌گانی از کشورهای تاجیکستان، قرقیزستان، افغانستان، پاکستان و همچنین بانک جهانی در دوشنبه برگزار شده است.

این دومین سفر هیأت طالبان به تاجیکستان محسوب می‌شود.

در خبرنامه آمده است: «در این نشست، وضعیت کنونی پروژه، پیشرفت‌ها، راه‌حل‌های مشکلات، جنبه‌های مختلف دیگر و برنامه‌های آینده مورد بحث قرار می‌گیرند.»

طالبان می‌گویند با حمایت مالی بانک جهانی متعهد به تکمیل این پروژه در خاک افغانستان هستند.

پروژه کاسا ۱۰۰۰ بزرگ‌ترین طرح انتقال برق از آسیای میانه به آسیای جنوبی دانسته می‌شود که از طریق افغانستان عبور می‌کند و بر پایه منافع اقتصادی مشترک میان کشورها بنا شده است.