طالبان: شماری از دانشجویان برای ادامه تحصیل به قزاقستان اعزام می‌شوند

وزارت تحصیلات عالی طالبان می‌گوید، قرار است به زودی ۳۰ تن از جوانان افغانستانی برای ادامه تحصیل در مقاطع لیسانس، ماستری و دکتورا عازم کشور قزاقستان شوند.

محمد طاهر احمد، معین امور محصلان وزارت تحصیلات عالی طالبان در مراسمی در کابل ضمن قدردانی از کشور قزاقستان بابت اهدای بورسیه‌های تحصیلی به جوانان افغانستانی، روی گسترش روابط علمی و اکادمیک با آن کشور تاکید کرد.

به نقل از خبرنامه طالبان، معین این وزارت همچنان خطاب به محصلان کامیاب شده، آنان را سفیران کشور شان خوانده، افزود :«شما در کنار حفظ ارزش‌های دینی و ملی خویش به قوانین و فرهنگ کشور میزبان نیز احترام گذاشته به فراگیری علم و دانش تان بیشتر توجه نمائید.»

به گفته‌ وزارت تحصیلات عالی در امتحان یاد شده ۲۵۶ تن اشتراک کرده بودند که از جمله ۳۰ تن در مقاطع لیسانس، ماستری و دکتورا کامیاب شدند که قرار است جهت تحصلات عالی در رشته‌های اقتصاد، کمپیوتر ساینس، حقوق، فزیک، بیولوژی و کیمیا در آینده نزدیک عازم کشور قزاقستان شوند.