طالبان: تاجیکستان و ازبیکستان چرخبال‌های افغانستان را برگردانند

وزارت دفاع طالبان بار دیگر از تاجیکستان و ازبیکستان می‌خواهد که با توجه به اصول همسایه‌گی و روابط دیپلوماتیک، چرخبال‌های منتقل شده را به افغانستان برگردانند.

عنایت الله خوارزمی، سخنگوی وزارت دفاع طالبابن با تاکید بر این‌که چرخبال‌های منتقل شده از حکومت و مردم افغانستان است، می‌گوید که این چرخبال‌ها را از ازبیکستان و تاجیکستان خواهند گرفت.

عنایت الله خوارزمی به طلوع‌نیوز گفت: «ازبیکستان یا تاجیکستان کشورهای همسایه ماست. ما با آنان خواهان روابط نیک هستیم و درخواست ما از آنان این است که با درنظرداشت اصول همسایه‌داری و دپلوماتیک این را به مردم افغانستان تحویل دهند و هر زمانی که باشد؛ گرفته خواهد شد.»

پیش از این، ایالات متحده امریکا اعلام کرده است که چرخبال‌ها و هواپیمای‌های نظامی دوره جمهوریت را به طالبان نخواهد داد.

گفتنی است چرخبال‌های که به تاجیکستان و ازبیکستان منتقل شده‌اند، از سوی امریکا خریداری و در اختیار اردوی پیشین کشور قرار داده شده بود.

گفته می‌شود نزدیک به ۶۰ چرخبال همزمان با سقوط نظام جمهوری، از سوی اردوی پیشین به ازبیکستان و تاجیکستان منتقل شدند.