سفر مقام ارشد امنیتی تاجیکستان به کابل و گفتگو با مقام‌های استخبارات طالبان

منابع دیپلماتیک از سفر رییس کمیته دولتی امنیت ملی تاجیکستان به کابل و دیدار و گفتگویش با مقام‌های اداره استخبارات طالبان خبر داده‌اند.

این منابع امروز سه‌شنبه، ۲۰ سنبله گفتند که سید مومن یتیموف؛ رییس کمیته دولتی امنیت ملی تاجیکستان در ماه آگست امسال به کابل سفر کرده و با مقام‌های طالبان درباره «تقویت روابط تاجیکستان با طالبان» بحث و گفتگو کرده‌است.

به گفته این منابع آقای یتیموف؛ بلندترین مقام استخباراتی تاجیکستان است که به دستور امامعلی رحمان؛ رییس‌ جمهور این کشور به کابل سفر کرده و با طالبان گفتگو کره‌است. منابع همچنین گفتند که رییس کمیته دولتی امنیت ملی تاجیکستان پس از بازگشت به دوشنبه، سفر خود را «پر محتوی» خوانده است.

تاجیکستان تنها کشور آسیای میانه است که پیش از این از برقراری روابط سیاسی و دیپلماتیک با طالبان خودداری کرده بود و طالبان را متهم به حمایت از تروریزم کرده بود. این کشور همچنین بارها تاکید کرده بود که طالبان دولت همه شمول با حضور همه اقوام تشکیل دهند.

امامعلی رحمان؛ رییس جمهور این کشور در سال ۱۴۰۱ گفت که طالبان سیاست تهاجمی تبعیض آمیز علیه اقوام مختلف افغانستان را دنبال می‌کنند.

پس از تسلط دوباره طالبان بر افغانستان، شماری از نظامیان پیشین و مخالفان سیاسی طالبان به تاجیکستان پناه بردند. همچنین شماری از اعضای رهبری جریان نظامی ضد طالبان موسوم به جبهه مقاومت ملی در تاجیکستان به سر می‌برند.