رییس جمهور تاجیکستان با رییس آی‌اس‌آی دیدار کرد

امامعلی رحمان؛ رییس جمهور تاجیکستان با رییس سازمان اطلاعات نظامی پاکستان (آی‌اس‌آی) دیدار کرد. دوطرف در این دیدار درباره روابط دو کشور گفتگو کردند.

امامعلی رحمان؛ رییس‌ جمهور تاجیکستان، روز دوشنبه، ۱۰ جدی با محمد عاصم ملک؛ رییس سازمان اطلاعات نظامی پاکستان (آی‌اس‌آی) در شهر دوشنبه دیدار و گفتگو کرد.

جنرال ملک سه ماه پیش به عنوان رهبر نهاد بانفوذ اطلاعات نظامی پاکستان منصوب شد و جایگزین جنرال ندیم انجم شد که در سال ۲۰۲۱ با فرمان عمران خان، نخست‌وزیر پیشین پاکستان، رییس این نهاد اطلاعاتی شده بود.

رییس آی‌اس‌آی یکی از مهم‌ترین سمت‌ها در پاکستان است که نفوذ زیادی در امور نظامی، سیاست داخلی و روابط بین‌المللی دارد.

جزئیات این دیدار منتشر نشده؛ اما گفته می‌شود که دوطرف روی روابط دو کشور گفتگو کرده و امامعلی رحمان روابط سیاسی دو کشور را «باثمر» و دیوار اعتماد را «بلند» توصیف کرده است.

به گفته دفتر مطبوعات ریاست جمهوری تاجیکستان، دو مقام بر تقویت همکاری تاجیکستان و پاکستان در زمینه مبارزه با تروریزم، افراط‌گرایی، رادیکالیزم، قاچاق مواد مخدر و جرایم فراملی تأکید کردند.

رییس‌ جمهور تاجیکستان ضمن تأکید بر همکاری در بخش امنیت، تماس دائم مسئولان امنیتی را به منفعت تاجیکستان و پاکستان خواند.