روسیه: طالبان در تأمین امنیت مرزها ناکام مانده‌اند؛ هشدار درباره تغییر ترکیب جمعیتی شمال

سفیر روسیه در تاجیکستان با ابراز نگرانی از ناامنی در مرزها و نفوذ گروه‌های تروریستی از افغانستان به کشورهای همسایه و منطقه می‌گوید که طالبان نتوانسته‌اند امنیت مرزها را تامین کنند. او همچنین با اشاره به گسیل پناهجویان اخراجی از پاکستان به سمت شمال کشور، درباره تغییر ترکیب جمعیتی مناطق شمالی افغانستان هشدار داده است.

سمیون گریگوریف؛ سفیر روسیه در تاجیکستان، امروز دوشنبه، ۲۷ قوس در مصاحبه با خبرگزاری تاس گفته است که طالبان هنوز نتوانسته‌اند امنیت مرزها را تامین کند.

او گفته که افراط‌گرایان در سال ۲۰۲۳ بارها تلاش کردند که از افغانستان به تاجیکستان نفوذ کنند.

او همچنین گفته: «ما هیچ پیشرفت خاصی را در وعده‌های طالبان در بخش تامین امنیت کشورهای همسایه افغانستان نمی‌بینیم.»

سمیون گریگوریف تصریح کرده: «در طول سال جاری، افراط‌گرایان در تلاش نفوذ به خاک تاجیکستان از مرز افغانستان بودند که خوشبختانه تمام این حملات به سرعت توسط نیروهای امنیتی تاجیکستان سرکوب شدند.»

این دیپلمات روس افزوده که افغانستان در حوزه اجتماعی و اقتصادی هم رو به سقوط است و این کشور به معنای واقعی کلمه در آستانه یک بحران انسانی شدید است.

اظهارات او در حالی مطرح شده که ولادیمیر پوتین؛ رییس جمهور روسیه و امامعلی رحمان؛ رییس جمهور تاجیکستان ماه گذشته در مسکو درباره وضعیت افغانستان گفتگو کردند.

سفیر روسیه در تاجیکستان می‌گوید که توجه جدی رهبران روسیه و تاجیکستان به موضوع افغانستان کاملا موجه و مستلزم هماهنگ‌سازی مداوم است.

در همین حال، او از افزایش قاچاق مواد مخدر صنعتی از افغانستان هم خبر داده و انتقاد کرده که کشورهای غربی عملا بودجه برنامه‌های مبارزه با مواد مخدر از افغانستان را کاهش داده‌اند.

سفیر روسیه از هجوم گسترده پناهجویان اخراجی از پاکستان به ولایات شمالی هم ابراز نگرانی کرده است. به گفته وی، در این شرایط، تغییر ترکیب قومی جمعیت در شمال افغانستان امکان‌‌پذیر است.

سمیون گریگوریف هشدار داده است که «ممکن است عناصر تروریستی در میان آوارگان وجود داشته باشند.»

او گفته که روسیه تمام تلاش خود را برای جلوگیری از حملات به متحدان خود که یکی از آن‌ها تاجیکستان است، انجام خواهد داد.

خبرگزاری دولتی تاجیکستان ماه سنبله سال جاری از کشته شدن سه «تروریست» به دست نیروهای امنیتی این کشور در مرز افغانستان خبر داد.

کمیته امنیت ملی تاجیکستان در آن زمان اعلام کرد که این افراد اعضای گروه «جماعت انصارالله» بودند و از افغانستان وارد این کشور شده بودند.

در ماه ثور سال جاری نیز کمیته امنیت ملی تاجیکستان اعلام کرد که دو عضو سازمان‌های تروریستی بین‌المللی که از مرز افغانستان وارد تاجیکستان شده بودند، هدف قرار گرفتند و کشته شدند.

مقام‌های تاجیکستان و سایر کشورهای آسیای میانه، بارها از افزایش فعالیت‌های تروریستی در افغانستان و سرازیر شدن آنها به این کشورها، ابراز نگرانی کرده‌اند.