دوازده‌همین نشست امنیتی هرات در اسپانیا برگزار می‌شود

دوازدهمین نشست امنیتی هرات قرار است فردا (سه‌شنبه، ۷ حوت) در شهر مادرید اسپانیا برگزار شود.

انستیتوت مطالعات استراتژیک افغانستان، امروز دوشنبه، ۶ حوت اعلام کرده است که دوازدهمین نشست امنیتی هرات قرار است فردا (سه‌شنبه، ۷ حوت) در شهر مادرید اسپانیا برگزار شود.

قرار است در این نشست چهره‌های سیاسی، مقام‌های پیشین دولت افغانستان، نماینده‌های سازمان‌ها و کشورها اشتراک کنند.

بر بنیاد خبرنامه انستیتوت مطالعات استراتژیک افغانستان، در این نشست درباره نمایندگی افغانستان در سیاست‌های جهانی، تروریزم و چگونگی کارکرد دیپلماسی برای آینده کشور بحث خواهد شد.

این در حالی است که نشست پیشین امنیتی هرات که یازدهمین دور آن بود، در دوشنبه، پایتخت تاجیکستان برگزار شد.

در نشست قبلی روی «انحصار قدرت توسط طالبان» در افغانستان و پیامدهای آن روی آینده کشور بحث شد.

در نشست پیشین ۱۵۰ شرکت‌کننده از ۲۰ کشور، سازمان‌های بین‌المللی، نمایندگان گروه‌های سیاسی و مقام‌های حکومتی پیشین افغانستان اشتراک داشتند.