تاجیکستان گذرگاه شیرخان بندر را بروی انتقال اموال تجارتی باز کرد

مقامات تاجیکستانی بعد از حدود یک هفته از مسدود کردن مرزهایش با افغانستان، دوباره دروازه شیرخان بندر در ولایت کندز را بروی اموال تجارتی افغانستان باز کرد.

نعمت‌الله تیموری، سخنگوی والی کندز گفته است که از روز گذشته به این طرف، از دروازۀ مرزی شیرخان بندر میان افغانستان و تاجیکستان، تنها به اموال تجارتی اجازۀ حمل و نقل داده شده است.

آقای تیموری افزود که هنوز هم این دروازه به روی افغان‌هایی که برای سیاحت می‌روند، بسته است؛ اما موترهای تاجیکی، اموال تجارتی را به افغانستان وارد می‌کنند و از این طرف نیز کالاهای تجارتی را به تاجیکستان می‌برد.

او گفت که اکنون تاجران افغان می‌توانند اموال شان را به کمک موترهای تاجیکی به تاجیکستان انتقال دهند.

ولایت های بدخشان، تخار و کندز در شمال افغانستان با تاجیکستان مرز مشترک دارند.

افغانستان و تاجیکستان حدود ۱۳۰۰ کیلومتر مرز مشترک دارند، این مرزها پیش از این نیز به دلیل جلوگیری از رفت و آمد شورشیان از خاک هر دو کشور بسته شده بود.

باشندگان مناطق سرحدی بدخشان افغانستان نگران اند که اگر تاجیکستان اجازۀ رفت و آمد را به آنان از طریق شیرخان بندر ندهد، ممکن که مردم در جریان زمستان با کمبود شدید مواد غذایی مواجه شوند.