تاجیکستان: مبادلات تجاری میان این کشور و افغانستان افزایش یافته است

آژانس آمار تاجیکستان اعلام کرده است که مبادلات تجاری این کشور و افغانستان در پنج ماه اول سال جاری میلادی به حدود ۴۰ میلیون دالر رسیده است.

آژانس آمار تاجیکستان امروز چهارشنبه، ۲۵ سرطان اعلام کرده است که مبادلات تجاری این کشور و افغانستان در پنج ماه اول سال جاری میلادی به حدود ۴۰ میلیون دالر رسیده است.

بر اساس گزارش رسانه‌های تاحیکستانی، این رقم ۳۱.۱ درصد بیشتر از مدت زمان مشابه در سال گذشته میلادی بوده است.

به گزارش رسانه‌های تاجیکستان به نقل از آژانس آمار این کشور، تقریباً ۸۰ درصد از کل گردش مالی تجاری، حدود ۳۲ میلیون دالر از صادرات تاجیکستان به افغانستان بوده است.

صادرات اصلی از تاجیکستان به افغانستان برق، مصالح ساختمانی، سیمان، زغال سنگ، کودهای معدنی و محصولات غذایی هستند.

واردات از افغانستان هم تقریبا ۸ میلیون دالر اعلام شده که شامل محصولات کشاورزی، انجیر، کشمش و پنبه بوده است. افغانستان همچنین فرش، سنگ‌های قیمتی و نیمه قیمتی را به بازار تاجیکستان عرضه می‌کند.