تاجیکستان با پذیرش دیپلمات طالبان در دوشنبه موافقت کرد

دولت تاجیکستان اعلام کرده است که یک دیپلمات از طالبان را در سفارت افغانستان در دوشنبه می‌پذیرد. این اقدام در حالی انجام می‌شود که مقامات تاجیک در گذشته نسبت به امنیت مرزهای خود با افغانستان ابراز نگرانی کرده‌اند.

منابع خبری گزارش داده‌اند که دولت تاجیکستان با پذیرش یک دیپلمات طالبان در سفارت افغانستان در دوشنبه موافقت کرده است. به نقل از دفتر منطقه‌ای خبرگزاری تسنیم، این توافق به «ظاهر اغبر» سفیر افغانستان ابلاغ شده است تا امور سفارت را به‌طور مشترک با دیپلمات طالبان پیش ببرد.

بشیر احمد قاسانی، خبرنگار افغان، نیز اشاره کرده است که دولت تاجیکستان یا طالبان تا کنون در این خصوص اظهار نظری نکرده‌اند. پیش از این، سفارت افغانستان در دوشنبه از پذیرش مدیریت کابل خودداری کرده و امور خود را با هماهنگی امرالله صالح، معاون اول رئیس‌جمهور سابق، به پیش می‌برد.

این در حالی است که «ذبیح‌الله مجاهد»، سخنگوی حکومت طالبان، در واکنش به نگرانی‌های امنیتی مقامات تاجیکستان از خاک افغانستان گفته بود که این نگرانی‌ها بی‌اساس بوده و از خاک افغانستان تهدیدی متوجه دیگر کشورها نخواهد بود.