امامعلی رحمان: ولایت های شمالی افغانستان محل پرورش تروریسم بین المللی شده است

رئیس جمهور تاجیکستان گفت افغانستان به ویژه ولایات شمالی آن محل پرورش تروریسم بین‌المللی شده است.
نمایندگان کشورهای تاجیکستان، ازبکستان، و ترکمنستان در نشست سران اتحادیه اروپا و آسیای میانه خواهان توجه جهان به وضعیت کنونی افغانستان شدند.

امام‌علی رحمان، رییس‌جمهور تاجیکستان، در نشست آسیای مرکزی و اتحادیه اروپا، که در شهر چولپون آتا قرقیزستان برگزار شده بود، تأکید کرد قلمرو افغانستان، به‌ویژه ولایت‌های شمالی و شمال‌شرقی این کشور محل پرورش تروریسم بین‌المللی شده است.

رییس‌جمهور تاجیکستان گفت افغانستان هم‌چنان یکی از بزرگ‌ترین تولیدکنندگان مواد مخدر در جهان است، تا جایی که اکنون در زیر سلطه طالبان، تولید مواد مخدر چند برابر افزایش یافته است.

امام‌علی رحمان ضمن ابراز نگرانی از وضعیت افغانستان از جامعه جهانی خواست تا برای تقویت مرزها با افغانستان کمک‌های‌شان را افزایش دهند.

گفته‌های رئیس جمهور تاجیکستان در حالی مطرح می‌شود که تاجیکستان پس از تهدیدهای فزاینده از خاک افغانستان، به‌تازگی دو پاسگاه جدید امنیتی در مرز افغانستان ساخته است.