اعطای بورسیه تحصیلی برای شماری از مهاجران افغانستانی از سوی تاجیکستان

وزارت معارف تاجیکستان سالانه ۴۰ تا ۵۰ بورسیه تحصیلی را برای آنعده از شهروندان افغانستان فراهم می‌کند که در آن کشور سکونت دارند و دورۀ تعلیمی را به پایان رسانیده و اسناد معتبر فراغت در دست دارند.

نوروز جمعه مراد، رییس مرکز مطبوعات وزارت معارف و علم تاجیکستان، به صدای امریکا گفت که سالانه ده‌ها متعلم دختر و پسر افغانستانی در دانشگاه‌های ملی تاجیکستان جذب می شوند.

او گفت:‌ هر سال حدود ۴۰ تا ۵۰ سیت جدا می‌شود و شهروندان افغانستان در موسسه‌های تحصیلات عالی و بانفوذ کشور مانند دانشگاه ملی تاجیکستان، دانشگاه طبی بنام ابو علی ابن سینا، دانشگاه دولتی آموزگاری موسوم به صدرالدین عینی و دیگر دانشگاه ها تحصیل می‌کنند.

آقای مراد می افزاید که امسال هم وزارت معارف و علم جمهوری تاجیکستان ۴۰ بورسیه تحصیلی را برای شهروندان افغانستان جدا کرده است که در دایره این بورسیه ها شهروندان افغانستان می‌توانند در دانشگاه های عالی تاجیکستان تحصیل خود را ادامه دهند.

این درحالیست که سفارت افغانستان در شهر دوشنبۀ، پایتخت تاجیکستان، در هفتۀ گذشته میزبان محفل فراغت ۴۱ دانش آموز پناهجوی افغان از جمله ۱۴ دختر بود که از لیسۀ سامانیان فارغ شده بودند.

مسوولین وزارت معارف و علم جمهوری تاجیکستان قید کرده اند که جریان قبولی دانش آموزان افغانستان به دانشگاه های عالی تاجیکستان طبق مقررات، سند های معیاری و حقوقی این کشور تنظیم شده و همزمان در این عرصه به آنها امتیازات داده شده است.

با تسلط دوبارۀ طالبان در افغانستان و به ویژه پس از آنکه دروازه های تعلیمی و تحصیلی به روی دختران این کشور مسدود شد، شمار زیادی از خانواده ها برای فراهم کردن شرایط تحصیلی فرزندان شان، افغانستان را ترک کرده به کشورهای همسایه به شمول تاجیکستان پناهنده شدند.