اعزام نیروهای انتحاری طالبان به ولایات هم‌مرز با تاجیکستان

در پی افزایش تنش میان طالبان و تاجیکستان، واحدهای نظامی انتحاری طالبان در ولایات مرزی با تاجیکستان مستقر شدند.

به گفته مقامات محلی طالبان، کندک انتحاری این گروه در ولایت‌های شمال شرقی از جمله بدخشان ایجاد شده است.

عبدالباسط بدر، مسئول قطعه نظامی کندک انتحاری طالبان به رسانه‌ها گفت: این نیروها به زودی برای انجام وظیفه در ولسوالی اشکاشم مستقر خواهند شد.

وی گفته است که این قطعه به سلاح‌های روسی.‌ ام فور‌، ام شانزده، پیکا و راکت و سلاح‌های سبک و سنگین مجهز است.

طالبان پیش از این نیز از مستقر شدن شاخه انتحاری خود در ولایت قندوز در مرز تاجیکستان خبر داده بود.

این در حالی است که به تازگی مقام‌های روسیه از افزایش تنش میان طالبان و تاجیکستان ابراز نگرانی کرده است.

طالبان به اظهارات امام‌علی رحمان؛ رئیس جمهوری تاجیکستان که خواستار دولت فراگیر در افغانستان شده بود، واکنش تندی نشان داده است.

ملا عبدالغنی برادر، معاون اول رئیس دولت طالبان گفته بود که تاجیکستان در امور داخلی افغانستان مداخله می‌کند. وی هشدار داده بود که هر اقدامی واکنشی نیز خواهد داشت.