یک مقام امنیتی تاجیکستان در درگیری با قاچاقچیان افغان کشته شد

رسانه‌های دولتی تاجیکستان گزارش داده‌اند که یک مقام امنیتی محلی این کشور در درگیری با قاچاقچیان مواد مخدر افغانستان کشته شده‌است.

نشریه «ای‌کی‌آی پرس» روز جمعه، ۸ ثور، به نقل از منابع آگاه گزارش داد که رییس کمیته‌ امنیت ملی ولایت خودمختار بدخشان، شامگاه پنج‌شنبه در جریان عملیاتی علیه فروشندگان مواد مخدر در مرز افغانستان کشته شده است.

منابع محلی تاجیکستان گزارش داده‌اند که مقام کشته شده کامران رجب‌زاده؛ رییس امنیت ملی ولایت خودمختار بدخشان تاجیکستان بوده است.

خبرگزاری دولتی تاجیکستان وقوع این درگیری را تایید کرده و گزارش داده که پنج‌شنبه شب ساعت ۱:۳۰، گروه ۸ نفری قاچاق‌بران مسلح از ولسوالی شغنان ولایت بدخشان افغانستان به «مقصد انتقال مواد مخدر در حجم کلان و سلاح و لوازم جنگی، از خط سرحد دولتی تاجیکستان و افغانستان قصد عبور داشتند.»

بر اثر درگیری سه قاچاقچی و یک عضو مرزبانی تاجیکستان کشته شده‌اند.

رسانه‌های تاجیکستان افزوده‌اند که در این زمینه، تحقیقات فوری آغاز شده است.

خبرگزاری دولتی تاجیکستان (خاور) نیز گزارش داد که پنج‌شنبه شب، از ورود غیرقانونی ۸ قاچاقچی مسلح از افغانستان به خاک تاجیکستان جلوگیری شده است.

این در حالی است که سال گذشته نیز در همین زمان، درگیری در مرز افغانستان و تاجیکستان صورت گرفته بود. منابع آگاه محلی گزارش دادند که این درگیری در نتیجه‌ تنش لفظی میان مرزبانان تاجیکستان و طالبان رخ داده است.

روابط تاجیکستان با طالبان از ابتدای تسلط این گروه در افغانستان پرتنش بوده و دوشنبه همواره از تجمع تروریست‌ها در شمال افغانستان ابراز نگرانی کرده است.

در ماه جنوری سال گذشته، امامعلی رحمان؛ رییس‌ جمهوری تاجیکستان، در نشستی مجازی با اعضای پیمان امنیت جمعی، از افزایش تهدیدها در امتداد مرز تاجیکستان با افغانستان ابراز نگرانی کرد.

به گفته امامعلی رحمان، بر اساس اطلاعات سازمان‌های امنیتی تاجیکستان، بیش از ۶ هزار تروریست در امتداد مرز افغانستان با آسیای میانه مستقر شده اند و اوضاع در کنار این مرز هر روز پیچیده‌تر می‌شود.

خبرگزاری تاس روسیه به نقل از رییس‌ جمهوری تاجیکستان گفت: «به طور کلی و بر اساس اطلاعات تاجیکستان، بیش از ۴۰ اردوگاه و مرکز آموزشی تروریست‌ها در ولایت‌های شمال‌ شرقی افغانستان وجود دارند که بیش از شش هزار شبه‌ نظامی را در خود جای داده‌اند.»

رییس‌ جمهوری تاجیکستان درباره بدتر شدن اوضاع در مرز آن کشور با افغانستان هشدار داد و افزود که درگیری‌های داخلی طالبان هم هرازگاهی در امتداد مرز اتفاق می‌افتد.