متهم‌شدن مقامات تاجیکستان به مجازات جمعی مخالفان حکومت

فعالان حقوق بشر، تاجیکستان را به مجازات اقارب مخالفان حکومت این جمهوری آسیای مرکزی متهم می‌سازند.

پس از اعتراضات علیه امام علی رحمان، رئیس جمهور تاجیکستان در برلین، به قول فعالان حقوق بشر، ده ها تن از اقارب تظاهرکنندگان در این جمهوری آسیای مرکزی بازداشت شده اند.

بر اساس اعلامیه مطبوعاتی سازمان دیده بان حقوق بشر در آسیای میانه، زینت سلطانعلیوا، سخنگوی این سازمان روز جمعه گفته است: «مقامات تاجیکستان از سال‌ها به این طرف با مجازات دسته جمعی، در برابر فعالیت سیاسی فعالان خارج از کشور واکنش نشان می‌دهند.» او این امر را نقض آشکار تعهدات مقامات دوشنبه برای حمایت از حقوق بشر خوانده است.

به قول دیده بان حقوق بشر، حدود ۵۰ تن از بستگان اپوزیسیون در تاجیکستان بازداشت شده و مورد بازجویی قرار گرفته اند. این سازمان افزوده است در حالی که برخی از این افراد دوباره آزاد شده اند، شمار دیگری، به اتهامات نامشخص، هنوز در بازداشت بسر می‌برند.

دیده بان حقوق بشر خواستار آزادی فوری آنها شده است.

در پایان ماه سپتمبر امسال، فرانک والتر شتاینمایر، رئیس جمهور آلمان و اولاف شولتس صدراعظم این کشور، از سران پنج کشور آسیای مرکزی در برلین پذیرایی کردند، که رئیس جمهور تاجیکستان نیز در جمع آنان بود.

گروه های اپوزیسیون تاجیکستان در خارج از این کشور، به این دیدار اما علی رحمان اعتراض کردند.