طالبان به سفارت افغانستان در تاجیکستان دیپلمات می‌فرستد
- انتشار: ۱۶ عقرب ۱۴۰۲
- سرویس:
- شناسه مطلب: 159449
براساس مکتوبی که از وزارت خارجه طالبان به رسانه‌ها رسیده گفته شده که این گروه می‌خواهد به سفارت افغانستان در تاجیکستان دیپلمات بفرستد.
براساس مکتوبی که روز دوشنبه، ۱۵ عقرب به رسانه‌ها رسیده، وزارت خارجه طالبان یک دیپلمات را برای سفارت افغانستان در تاجیکستان معرفی کرده است.
بربنیاد گزارش‌ها، فردی به نام فیض‌الله به عنوان سکرتر اول در این سفارت گماشته شده است.
منابع رسانه‌ای گزارش داده‌اند که طالبان وعده کرده است که معاش‌های شش ماهه پرداخت ناشده کارمندان سفارت افغانستان در تاجیکستان را نیز پرداخت خواهد کرد.
تاجیکستان رابطه نزدیکی با مخالفان طالبان دارد و سفیر حکومت پیشین افغانستان در این سفارت بارها علیه طالبان موضع گرفته است.
طالبان با این که از سوی تاجیکستان به رسمیت شناخته نشده؛ اما قصد دارد با گماشتن یک دیپلمات به حضور خود در این کشور رسمیت ببخشد.
وزارت خارجه طالبان در این مکتوب از سفارت افغانستان خواسته است تا موضوع تقرر دیپلمات جدید را به حکومت تاجیکستان اطلاع دهد.
هنوز روشن نیست که در صورت همکاری سفارت افغانستان در دوشنبه، آیا حکومت تاجیکستان مانند کشورهایی چون ترکیه و ازبکستان، دیپلمات طالبان را می‌پذیرد یا نه.
هیچ کشوری در دو سال گذشته طالبان را به رسمیت نشناخته است و بیش‌تر سفارت‌ها در اختیار سفیران و کارمندان دولت پیشین است.
نظرات(۰ دیدگاه)