سازمان پیمان امنیت جمعی: تلاش‌های جدی برای تقویت مرز تاجیکستان با افغانستان جریان دارد

یمانگلی تاسماگمبتوف، دبیر کل سازمان پیمان امنیت جمعی می‌گوید که قرار است این سازمان از ماه جولای سال جاری میلادی طرح تقویت امنیت مرز تاجیکستان با افغانستان را اجرایی کند.

تاسماگمبتوف در گفت‌وگو با خبرگزاری تاس که روز سه‌شنبه، ۲۲ حوت منتشر شده، گفته که پیش‌نویس این طرح از سوی شورای دایمی این پیمان تایید و به کشورهای عضو آن ارایه شده است.

به گفته وی، تلاش‌های جدی از سوی سازمان پیمان امنیت جمعی برای تقویت مرز تاجیکستان با افغانستان جریان دارد.

این مقام ارشد سازمان پیمان امنیت جمعی تاکید کرد که اراده سیاسی تاجیکستان و قرقیزستان که در معرض بیشتر تهدیدات تروریستی از خاک افغانستان قرار دارند، برای اجرای این طرح مهم است.

گفتنی است که پیش از این، کشورهای عضو این سازمان منطقه‌ای از خطر نفوذ گروه‌های تروریستی به کشورهای آسیای مرکزی از خاک افغانسان زیر سلطه طالبان، هشدار داده بودند.

این در حالی است که اعضای سازمان پیمان امنیت جمعی (سی‌او‌اس‌تی‌او) در ماه قوس گفته بود که به‌دلیل خطر نفوذ گروه‌های تروریستی از افغانستان به آسیای مرکزی، مرز تاجیکستان با افغانستان را تقویت می‌کنند.