طالبانو په څو ولایتونو کې د ودانیزو جوازونو مرکزونه فعال کړل
د طالبانو د ښاروالیو عمومي ریاست اعلان کړی چې د غیرمعیاري ودانیو د مخنیوي لپاره یې د ودانیزو جوازونو د صادرو مرکزونه په یو شمېر ولایتونو کې فعال کړي دي. د دې ریاست د چارواکو په وینا، دغه مرکزونه د معیاري ودانیزو کارونو د پلي کولو او د ښاري نقشهګذاري پر بنسټ د جوړښتونو د قانوني بهیر د منظمېدو لپاره رامنځته شوي دي. فیضمحمد غوزنګ، د ښاروالیو د عمومي ریاست د بودیجې رئیس، ویلي چې دا مرکز د ښارونو د اوسېدونکو د اسانتیا لپاره جوړ شوی او له دې وروسته د کورونو مالکانو ته اړتیا نشته چې د کارونو د بشپړولو لپاره بېلابېلو ادارو ته مراجعه وکړي. د ده په وینا، لکه برېشنا، د اور وژنې او اوبه رسونې خدمتونه په همدې واحد کې متمرکز شوي دي. غوزنگ زیاته کړه چې د یوه ودانۍ د قانوني جوړېدو ټول پړاوونه تر ډېره په پنځلسو ورځو کې بشپړېږي. د ورکړل شویو معلوماتو له مخې، دا مرکزونه اوس په څو ولایتونو کې فعال دي او ټاکل شوې چې په راتلونکي کې د ټول هېواد په کچه پراخ شي.
