روسی ډیپلوماټ: اروپا به له روسیې سره خپله تګلاره بیا وڅېړي
د روسیې یوه لوړپوړي ډیپلوماټ ټینګار کړی چې د مسکو او اروپايي ټولنې ترمنځ روانې شخړې به دوام ونه کړي او اروپا به په پای کې اړ شي چې له روسیې سره خپله تګلاره بیا و ارزوي.
ولادیسلاو ماسلېنیکوف، چې د روسیې د بهرنیو چارو وزارت د اروپایي چارو د څانګې مشر دی، د «ایزوستیا» ورځپاڼې سره په مرکه کې ویلي چې د روسیې او اروپايي ټولنې اړیکې به تل په تورو شرایطو کې نه پاتې کېږي، ځکه د اروپايي کمیسیون مشرتابه جوړښت په راتلونکي کې بدلېدلی شي.
هغه د اروپايي کمیسیون د وختي جوړښت ته په اشاره زیاته کړه، دغه بنسټ د ټاکلي مودې لپاره ټاکل کېږي او اوسنی کمیسیون به د خپلې دندې له پای ته رسېدو وروسته نوی ځایناستی ولري؛ بدلون چې د مسکو او بروکسل ترمنځ د خبرو لوری بدلولی شي.
دغه روسي چارواکي همدارنګه هیله څرګنده کړې چې اروپايي ټولنه به په پای کې درک وکړي چې د بندیزونو تګلاره تر ټولو ډېر خپله اتحادیه زیانمنوي. د ده په وینا، اروپا به اړ شي دا حقیقت ومني چې روسیه، د یوه دایمي ګاونډي په توګه، د دې وچې د سیاسي او جغرافیایي معادلاتو یو نه بدلېدونکی برخه پاتې کېږي.
